Gicumbi :Abagore b’Akagali ka Mwendo ku isonga mu guteza imbere umuryango

 

Abagore bo mu kagali ka Mwendo , umurenge wa Muko akarere ka Gicumbi mu Ntara y’ Amajyaruguru , bibumbiye mu ishyirahamwe TWISUNGANE baravuga ko gahunda yo gukorera mu matsinda yabashoboje kwita  ku miryango yabo  bunganira abagabo  mu gutunga ingo.

Bamwe mu bagize ishyirahamwe Twisungane ry’i Mwendo (photo amateur )

Ubwo hizihizwaga  umunsi mpuzamahanga w’ umugore  aba bagore  bo mu kagali ka Mwendo bashyikirijwe n’ubuyobozi bw’ ishyirahamwe ryabo ibikoresho byo mu ngo  birimo amagodora, za telefoni zigendanwa,amatara yo gucana (mobisol),ibikoresho byo mu gikoni  n’ ibindi bikoresho by’ isuku  mu rwego rwo gushyigikira umugore mu iterambere ry’ urugo.Ibi bikoresho bikaba bifite agaciro gakabakaba  miliyoni  ebyiri n’ igice z’amafaranga y’ u Rwanda.

Bahawe ibikoresho byo mu rugo (photo amateur)

Umuyobozi w’ iri shyirahamwe  Mukamiligo Alvera  avuga ko uyu ari umusaruro wakomotse mu bikorwa by’ abo bagore .Agira ati “twatangiye mu mwaka w’2004 duterateranya igiceli cya mirongo itanu , tugeze ku musanzu w’ amafaranga igihumbi turahagarika  ahubwo dutangira kuguriza abanyamuryango .” Mukamiligo akomeza asobanura ko  batangiye ari abanyamuryango  57 none magingo aya  bageze ku 132  barimo n’abagabo 11.

Mu mwaka wa 2009 , abanyamuryango ba Twisungane  basanze ari ngombwa ko batekereza gukorana n’ ibigo by’ imari , batangira kwizigama no kwaka inguzanyo ari nako bazibyaza umusaruro .”icyo gihe twaguze isambu ya miliyoni ebyiri n’ igice  tukayihingamo ibirayi, ibitunguru n’ ibishyimbo bishingirirwa.”Uretse ibyo kandi ngo  guhera muri uwo mwaka  banatangiye guha agahimbazamusyi buri munyamuryango , ishyirahamwe rikamugurira itungo rigufi,ari nako bakomeza gutanga inguzanyo mu banyamuryango ku nyungu nto ya 5% mu kwezi.Ibyo ngo byafashije ababyeyi kwishyurira abana amashuri  ndetse no guteza imbere ingo zabo bavugurura amazu batuyemo . abandi bagakora imishinga mito mito ibabyarira inyungu.

Kugeza ubu ureste amasambu  abiri manini biguriye afite agaciro ka miliyoni zisaga eshanu , aba bagore  bamaze no kugura inzu y’ ubucuruzi mu gasanteri ka Mwendo ifite agaciro ka miliyoni ebyiri n’ igice izajya ibafasha kwinjiza umutungo mu ishyirahamwe .

Ryahinduye imyumvire y’ abagore

Umuyobozi w’ iri shyirahamwe  akaba  ndetse ari n’ umuyobozi w’ inama y’ igihugu y’ abagore mu kagari ka Mwendo Mukamuligo Alvera avuga ko imikorere y’aba bagore mu kwinjiza ifaranga  mu rugo byatumye bahindura imyumvire mu buryo bugaragara .Ati “usanga abagore bari mu ishyirahamwe batandukanye n’abandi mu myumvire no mu mibereho y’ ingo zabo  ndetse no kwitabira gahunda za Leta “Mukamuligo yongeraho ko  byanabaye umusemburo wo kurwanya amakimbirane yakundaga kuvugwa mu ngo kuko usanga umugore yarabaye umusemburo w’ iterambere ry’ urugo .

Abagabo bifuza kuba abanyamuryango

Bitewe n’ uburyo abagore  bo muri iri shyirahamwe biteje imbere  ngo kuri ubu batangiye kwakira abagabo basaba kuba abanyamuryango .”kugeza ubu dufite abagabo cumi n’umwe banditse basaba kuba abanyamuryango kandi twumva ko gufatanya n’abagabo ari intambwe ikomeye izatuma ishyirahamwe ryacu rirushaho kwaguka mu mikorere “

Guverineri w’ Intara y’ Amajyaruguru Gatabazi Jean Marie Vianney abinyujije k’urukuta rwe rwa Twitter yashimye intambwe aba bagore  bamaze kugeraho abizeza ubufatanye  no gukomeza kubaba hafi  kugira ngo bakomeza kuba  umusemburo w’ iterambere ry’ aho batuye .

UMUHIRE Valentin

 

Leave a Reply

Your email address will not be published. Required fields are marked *