Nta gitutu gikwiye gushyirwa ku bantu ngo bitabire ibiganiro byo kwibuka Jenoside nyuma y’imyaka 25 ibaye -CNLG

 

Kuva tariki ya 07 kugeza tariki ya 13 Mata 2019, isi yose  izibuka ku nshuro ya 25 Jenoside yakorewe abatutsi mu Rwanda mu mwaka w’ 1994.Umunyamabanga nshingwabikorwa wa Komisiyo y’ Igihugu yo kurwanya Jenoside Bizimana Jean Damascene avuga ko imyumvire y’ abanyarwanda ku birebana n’ ibikorwa byo kwibuka yazamutse k’uburyo ubu bitakiri ngombwa ko hari abantu bahatirwa kwitabira ibiganiro bitangwa mu cyumweru cy’icyunamo

Dr Bizimana Jean Damascene/ES CNLG

Mu kiganiro yahaye abanyamakuru ku wa gatanu tariki ya 22 Werurwe  2019 Dr Bizimana Jean Damascene yavuze ko kuri iyi nshuro  abanyarwanda bibuka Jenoside yakorewe abatutsi ,hari ibyemezo bishya byafashwe bijyanye na gahunda yo kwibuka.

Muri byo harimo ko mu gihe cy’icyumweru cy’ icyunamo imirimo cyangwa ibikorwa bitunga abantu mu mibereho yabo ya buri munsi bitazongera guhagarikwa  nkuko byajyaga bikorwa mu myaka yashize .Bizimana yagize ati “ibyemezo byo gufunga  ibikorwa  bitunga abantu mu mibereho yabo ya buri munsi ntibizongera kubaho.nyuma y’ imyaka 25 nta mpamvu yo gukoresha agahato cyangwa ingufu ngo abantu bitabire ibiganiro,imyumvire y’ abantu imaze gukura  bityo ababishoboye kandi babifitiye umwanya nibo bazajya babyitabira

Umunyamabanga nshingwabikorwa wa CNLG yabwiye abanyamakuru ko iki ari icyemezo cyafashwe n’ inzego zitandukanye zifite aho zihurira no gutegura igikorwa cyo kwibuka jenoside yakorewe abatutsi nyuma yo kubiganiraho inshuro nyinshi .Avuga kandi ko iki cyemezo ntaho gihuriye n’abavuga ko abapfobya Jenoside bashobora kucyuririraho bakakigira urwitwazo ;ati “si ugupfobya Jenoside kuko abayipfobya cyangwa ababigambiriye  niyo wabigisha imyaka ingahe  ntibapfa guhinduka”

Zimwe mu mpamvu zagendeweho mu ifatwa ry’ iki cyemezo harimo nuko ubushakashatsi bwagaragaje ko ibyaha bifitanye isano n’ ingengabitekerezo ya Jenoside byagabanutse ku kigereranyo cya 87.3% ibyo bikaba bigaragaza aho imyumvire y’ abanyarwanda igeze ku birebana n’ ibikorwa byo kwibuka .

Uretse n’ ibyo kandi Umunyamabanga nshingwbaikorwa wa CNLG avuga ko n’ibyaha by’ingengabitekerezo ya Jenoside bikorwa ; byinshi muri byo bigaragara nk’ibyaha bito kanshi bishingiye ku magambo gusa.Bityo rero ngo “nta mpamvu nimwe yo gushyiraho abantu agahato”

Muri iki gihe cyo kwibuka ku nshuro ya 25 jenoside yakorewe abatutsi mu w’1994 ibiganiro bizatangwa  mu cyumweru cy’icyunamo nabyo byaragabanijwe .Ku rwego rw’ imidugudu ,aho kuba buri munsi mu gihe cy’ icyumweru nkuko byari bisanzwe , hazatangwa ibiganiro bibiri gusa .Icya mbere kizatangwa tariki ya 07 Mata umunsi ny’irizina w’itangizwa ry’ icyunamo ,ikindi cya kabiri gitangwe tariki ya 10 Mata  mu masaha y’ igicamunsi .

Nubwo abantu bazakomeza imirimo yabo mu gihe cy’icyumweru cy’icyunamo no mu gihe cy’ ibiganiro ,Komisiyo y’ igihugu yo kurwanya Jenoside ivuga ko ibikorwa byose birebana n’ imyidagaduro bigomba guhagarikwa nkuko biteganywa  mu ngingo ya 9 y’ itegeko rigenga ibikorwa byo kwibuka .Utubari n’ahandi hagaragara ibikorwa by’imyidagaduro byasabwe kuzabihagarika  ariko kandi ngo ntibivuze ko utubari n’amahoteli bitagomba gukora nyuma na mbere  y’ amasaha yagenewe ibiganiro.Umuyobozi wa CNLG akaba ashishikariza abakoresha guha umwanya  abakozi bamwe bakitabira ibiganiro  mu gihe abandi baba basigaye mu kazi.

UMUHIRE Valentin

Leave a Reply

Your email address will not be published. Required fields are marked *