Amasomo make ku myororokere impamvu –muzi y’inda z’imburagihe mu rubyiruko

 

Ikibazo cy’inda z’imburagihe  ni kimwe mu bibazo byugarije urubyiruko mu Rwanda .Kugeza ubu imibare igaragazwa n’ ubushakashatsi yerekana ko kuva mu mwaka  wa 2017 abasaga  ibihumbi 16 buri mwaka batwita bari munsi y’imyaka y’ubukure .Bamwe mu rubyiruko rw’ abakobwa  ndetse n’ababakurikiranira hafi bashyira mu majwi kuba nta bumenyi  buhagije urubyiruko ruhabwa ku birebana n’ ubuzima bw’ imyororokere.

Mu nama iheruka  ya 2018 ya Youth Connekt  Ubuyobozi  bwa Imbuto Foundation  bwagaragaje ko nyuma yo kuganira n’abantu mu nzego zitandukanye  bwahakuye isomo ko mu gukemura iki kibazo cy’ abangavu  baterwa inda  z’imburagihe byagakwiye ko kivugwaho uko kiri nta kukinyura k’uruhande .
Imwe mu mpamvu –muzi yagaragajwe nk’itera iki kibazo harimo  no kutabona amakuru  ahagije  ku birebana n’ubuzima bw’imyororokere .

Umuyobozi w’urwego rushinzwe iyubahirizwa ry’ihame ry’uburinganire Madame Rwabuhihi Rose avuga ko ibijyanye n’imibonano mpuzabitsina  abantu basa n’ababigize nk’icyizira ku buryo  bigoye kubiganiraho mu buryo bweruye .Agira ati “ iki nicyo gihe  cyo kubwira  abana ko bakwiye gufata ibyemezo  byerekeye ubuzima bwabo .”
Umuyobozi w’ Ishami ry’ umuryango w’abibumbye  ryita ku baturage (UNFPA ) mu Rwanda Mark Bryan Schnreiner  avuga ko urubyiruko rufite ubuzima bwiza  bityo ruramutse ruhawe ubushobozi rwahindura isi .Ati “Dukeneye kwita ku rubyiruko rwacu turuha amakuru ajyanye n’imyororokere, tukanarwanya inda zitateguwe. Iyo umwangavu atwaye inda, amahirwe ye yo kugera ku ntego ze aragabanuka.”

Ikibazo kiri mu babyeyi n’abayobozi

Bamwe mu banyarwanda baganiriye na Valuenews.info bavuga ko kuganira ku mibonano mpuzabitsina  bisa n’ibyabaye ikizira  mu banyarwanda .Umwe muri bo ati ‘ abantu bareka kuvuga ibintu uko biri  bagatwarwa n’ ubwoba n’amarangamutima by’ababareba cyangwa babumva baganiriza urubyiruko.”Yongeraho ko imvugo za politiki z’abayobozi bamwe na bamwe zikwiye kugabanuka ahubwo abantu bagaha umwanya munini kuganira n’urubyiruko ku bibazo bibugarije .”Niba umwana  w’ umukobwa ajya mu mihango  ariko akaba atazi ibyamubayeho , umubyeyi  ntabashe  kumusobanurira uko abyitwaramo igihe yageze mu mihango , uragira ngo ayo makuru azayakure he”?

Uyu mubyeyi akomeza avuga ko kubwiza ukuri mu mvugo iboneye kandi yumvikana abana b’ abakobwa n’ abahungu bageze mu gihe cyo gutera no guterwa inda ari kimwe mu bikwiye gushyirwamo ingufu kugira ngo umwana akure azi icyo agomba kwirinda n’uburyo yakirinda igihe bimushyikiye .

Hari ingero zimwe na zimwe atanga  ziba ku bangavu n’abahungu  b’ingimbi ariko ugasanga kubibabwira mu mvugo nyayo bigora abantu bakuru .Ati “niba umwana w’ umwangavu n’ ingimbi ageze mu gihe cyo gushyukwa  kuki batigishwa uburyo barwanya uwo mushyukwe ?Ese igihe byanze ko aba bana barwanya uwo mushyukwe , kuki batigishwa uburyo bakwitwara mu bihe nk’ibyo birimo kuba bakwisanga mu mibonano mpuzabitsina  ariko nibura bagakoresha agakingirizo ?

Agira inama abashinzwe kwigisha abandi ko bakwiye gutinyuka  bagashira ubwoba bakavuga ibintu uko biri bashize amanga  kuko ari byo bishobora gufasha urubyiruko kwirinda ibyo bishuko cyangwa kumenya uko bitwara igihe byabarenze .

Undi mubyeyi waganiriye na Valuenews.info we agira ati “muri Afurika  nta mukobwa witwaza agakingirizo ,ahandi mu bihugu byateye imbere abagore n’abakobwa bigishwa  ko agakingirizo aribo kareba kuko ingaruka nyinshi nibo zibaho igihe katakoreshejwe .”

Akomeza yibaza impamvu  ki mu masakoshe y’abagore n’abakobwa habamo indorerwamo hatabamo n’agakingirizo kandi abantu bakabimenyera ko nta gikuba cyacitse, ntibumve ko waciye inka amabere.

Hari n’ababona ko muri iki gihe itangazamakuru n’ikoranabuhanga byafashe indi ntera mu kwamamaza ubusambanyi cyangwa gukangurira abantu gukora ubusambanyi bitewe n’ uko amakuru akwirakwizwa mu buryo bworoshye kubera imbuga nkoranyambaga .Aha bakavuga ko bikwiye kugira amabwiriza abigenga mu rwego rwo kurinda urubyiruko.

UMUHIRE Valentin

Leave a Reply

Your email address will not be published. Required fields are marked *