Cyuve : Amaganga y’inka n’inkari ni imari ishyushye

Yanditswe na UMUHIRE Valentin

Abaturage bo mu Mudugudu wa Rubandu, Akagari ka Bukinanyana , Umurenge wa Cyuve mu Karere ka Musanze  bavuga ko kuva aho bakoraniye na Kompanyi itunganya imyanda ikayikoramo ifumbire, inkari n’amaganga byabaye imari  muri ako gace .

Aya majerekani abitsemo inkari n’amaganga

Muri uyu Mudugudu wa Rubandu niho hari ikimoteri gikusanyirizwamo  ibishingwe byose bituruka mu ngo zo hirya no hino mu Karere ka Musanze .Abaturage baturiye iki kimoteri babanje kwinubira umunuko wacyo ,ariko kuri ubu bishimira ko  bakibyaza umusaruro babifashijwemo na Kompanyi itunganya ibishingwe .

Ikimpoteri cya Cyuve gikusanyirizwamo ibishingwe 

BIDEC Group Ltd ni Kompanyi   itunganya ibishingwe byo muri iki kimoteri ,nyuma yo kubivangura  ibibora n’ ibitabora  bakoramo ifumbire y’imborera.Umuyobozi wayo  mu Karere ka Musanze Tugiremungu Ernest yabwiye Valuenews ati “twe  tuvangura ibi bishingwe ibibora ukwabyo n’ ibitabora ukwabyo  ubundi tugakoramo ifumbire y’imborera tukayigurisha abaturage hirya no hino mu gihugu”.

Ngiyi ifumbire y’imborera ikorwa na BIDEC Group Ltd

Mu gukora iyi fumbire  Tugiremungu   avuga ko bavangavanga ibintu byinshi bitandukanye  birimo inkari n’amaganga.Yemeza ko nta handi babikura  uretse kuzigura n’abaturage baturiye ikimoteri.Agira ati “buri rugo mubo dukorana turuha amajerekani bitewe n’izo bumva  bashobora kubona , ijerekani yuzuye inkari n’amaganga tuyishyura amafaranga igihumbi “.

Tugiremungu avuga ko cyane cyane bakorana n’abo mu  miryango ikennye mu rwego rwo guharanira imibereho myiza yabo. Ibi ngo byatumye abaturiye icyo kimpoteri babona isoko ry’ inkari ku buryo ntawe ushobora kuzipfusha ubusa .

Umugabo witwa Rubanzabigwi Sipiriyani  aturiye ikimpoteri cya Cyuve .Agira ati “buri muntu iwanjye aba afite ikijerekani agomba kuzuza .Abana  tubashakira utudobo basobamo ubundi bagashyira mu ijerekani bagapfundikira zakuzura tukagemura kuri Kompanyi”.Uyu mugabo avuga ko kubika inkari n’amaganga   muri ako gace bamaze kubimenyera ngo kuko bazikuramo amafaranga .Ati “ino nta muntu wabona ukihagarika ku giti cyangwa ahandi , niyo zigufashe wiruka ujya mu rugo  gushaka icyo uzisobamo.”

Mu mvugo irimo n’urwenya , umwe mu bagore baganiriye na Valuenews ati “kubera imisururu myinshi tunywa inaha usanga nk’ijerekani umuntu ashobora kuyuzuza mu minsi itatu !”.

Mu ngo z’aba baturage  usangamo depo z’inkari n’amaganga .Gusa abo twaganiriye  ntabyaboroheye kwemera ko dufotora aho bazibika ,( wabonaga bisa n’ibibateye isoni) , bakavuga ko igikoresho cyose  kuva ku macupa y’amazi , utujerekani duto , utudobo n’amabesani byose  babikoresha mu kubika izo nkari n’amaganga .

Ba nyir’iyi Kompanyi bavuga ko iyo bagiye kuvanga ifumbire ingsno y’inkari  n’amaganga bakoreshwa igenwa n’ ingano y ibyo bari buvange.Tugiremungu  ati “biterwa n’ ingano y’ibyo tuvanga , nko muri toni 20 z’ ibishingwe byatunganijwe dushobora gukoresha nk’ibijerekani 20 by’inkari n’amaganga”

Gusa ariko ngo izikoreshwa zose, bikorwa ku bipimo kugira ngo zitazagira ingaruka ku bihingwa byashyizwemo iyo fumbire .

Gufata no kubika izi nkari n’ amaganga ngo bisaba kwitonda cyane no kwigengesera kugira ngo hatagira amazi na mba azimenekamo.Tugiremungu agira ati “abo dukorana twabanje  kubahugura uko bafata izo nkari n’amaganga k’uburyo nta mazi zahura nayo, iyo bibeshye hakajyamo amazi ntabwo tuzigura “.