Rwanda –Uganda :Inama ya Gatuna yatanze icyizere cyo gufungura imipaka

Yanditswe na UMUHIRE Valentin

 

Inama ya kane yahuzaga  abakuru b’ibihugu by’u Rwanda na Uganda ndetse n’abahuza , ku kibazo cy’umubano udahagaze neza hagati y’ibihugu byombi  isoje itanze icyizere ko urujya n’ uruza rw’abantu n’ibintu  rushoboka nibura nyuma y’iminsi mirongo ine n’itanu uhrereye kuri uyu wa 23 Gashyantare 2020.

Ni nyuma y’uko abantu benshi bari biteze ko iyi nama iza gufata umwanzuro urimo no gufungura imipaka  hagati y’ibihugu byombi , ariko ikaba irangiye  atariko bigenze  ahubwo hatanzwe igihe byazasuzumirwaho.

Kugira ngo ibyo nabyo bishoboke hari ibigomba kubanza gukorwa cyane cyane ku ruhande rwa Uganda.Yasabwe gukurikirana abantu bose Leta y’u Rwanda yayibwiye ko babangamiye umutekano n’ubusugire by’u Rwanda  kandi bakaba baba muri Uganda ari naho bakorera ibyo bikorwa .

Umwe mu myanzuro yafatiwe muri iyo nama n’uko Uganda igenzura ibyo bikorwa mu gihe cy’ ukwezi kumwe , hanyuma yasanga ibyo u Rwanda ruvuga bifite ishingiro  bigahagarikwa , kandi Komisiyo ihuriweho n’ibihugu byombi igaterana mu minsi mirongo itatu kugira ngo isuzume niba koko byarakozwe .

Nyuma y’iri  suzuma  niho hatekerezwa gahunda yo kurekura urujya n’uruza rw’abantu n’ ibicuruzwa  ku mpande zombi gusa hatanzwe iminsi 15 uhereye igihe isuzuma rizakorerwa  kandi bikazashingira ku byarivuyemo.

Muri iyi nama kandi hanasinywe amasezerano  yo guhererekanya abanyabyaha , amasezerano yasinywe na ba Minisitiri b’Ububanyi n’amahanga ku mpande zombi, Dr Biruta Vincent ku ruhande rw’ u Rwanda na Sam Kutesa ku ruhande rwa Uganda .