Amerika yisubiye,ingendo ziva mu Bwongereza nazo zahagaritswe

Icyo cyemezo kiratangira gukurikizwa saa sita z’ijoro so kuri uyu  wa mbere ku isaha yo muri Amerika, ni ukuvuga ku isaha ya saa kumi n’imwe za mu gitondo zo ku wa kabiri ku isaha yo mu Rwanda., nkuko byatangajwe na Visi Perezida w’Amerika Mike Pence.

Icyemezo cya Perezida Donald Trump cyo guhagarika ingendo zo mu bihugu 26 by’i Burayi bikoresha uburyo bw’umupaka ufunguye wo mu karere kazwi nka Schengen, cyatangiye gukurikizwa ku wa gatandatu tariki ya 14 Werurwe 2020.

Bwana Pence yanavuze ko buri Munyamerika agiye gupimwa coronavirus ku buntu.

Mu kiganiro n’abanyamakuru, Perezida Trump yavuze ko na we yamaze kwisuzumisha,Ibiro bye bya White House bikaba ejo byaratangaje ko  nta virusi bamusanzemo.

Muri Amerika habarurwa abantu 2,700 bamaze kuyandura naho abandi 54 imaze kubica.

Abantu barenga 132,500 bamaze kwandura coronavirus mu bihugu 123 ku isi, nkuko bitangazwa n’ishami ry’umuryango w’abibumbye ryita ku buzima (OMS/WHO).

OMS ivuga ko ubu Uburayi ari ryo “zingiro” ry’iyo virusi yatangiriye mu mujyi wa Wuhan mu Bushinwa.

Kugeza ku wa gatandatu mu gitondo, Amerika yari yamaze guhagarika ingendo mu gihe cy’iminsi 30 ziva mu bihugu 26 byo mu karere ka Schengen – 22 byo mu muryango w’Ubumwe bw’Uburayi (EU/UE) na bine bitari ibyo muri EU.

Ibyo bihugu ni Autriche , Ububiligi, Czech Republic, Denmark, Estonia, Finland, Ubufaransa, Ubudage, Ubugereki, Hongrie , Iceland, Ubutaliyani, Latvia, Liechtenstein, Lithuania, Luxembourg, Malta, Ubuholandi, Norvège (Norway), Pologne (Poland), Portugal, Slovakia, Slovenia, Espanye, Suède (Sweden) n’Ubusuwisi.

Icyo cyemezo cyo guhagarika ingendo cyakiranywe uburakari n’urujijo mu muryango wa EU, abayobozi muri uwo muryango bashinja Perezida Trump kuba yarafashe icyo cyemezo “atabagishije inama”.

Ubwongereza na Repubulika ya Ireland byari byarasonewe, ariko  ku wa gatandatu Bwana Trump yavuze ko nta musaruro wavuyemo,anemeza ko nabyo bikumirwa.

Umubare w’abamaze kwemezwa ko banduye coronavirus mu Bwongereza bageze ku 1,140, naho 21 imaze kubica – bavuye kuri 11 yari imaze kwica ku wa gatanu.

Bwana Pence yavuze ko abaturage b’Amerika baba muri ibyo bihugu ndetse n’abo amategeko y’Amerika yemerera kuba muri Amerika, bavuye muri ibyo bihugu, bo bacyemerewe gusubira muri Amerika.

Yavuze ko abantu nk’abo “bazayoborwa ku bibuga by’indege by’umwihariko bitabweho”

Leave a Reply

Your email address will not be published. Required fields are marked *