Gicumbi :Abahinzi ba Kawa barizeza NAEB umusaruro  no muri ibi bihe bya COVID19

Yanditswe na UMUHIRE Valentin

 

Abahinzi ba Kawa  izwi ku izina rya Mayogi Coffee  ihingwa  mu Murenge wa Muko, Akarere ka Gicumbi  baravuga ko bakameje ingamba zo kuyibungabunga  kugira ngo idakomwa mu nkokora n’ iki cyorezo cya Coronavirus .Aba bahinzi barizeza ikigo cy’ igihugu gishinzwe ibyoherezwa mu mahanga  NAEB ko  Ikawa ya Mayogi izakomeza kuba yayindi , haba mu buryohe  ndetse no mu musaruro .

Muri iki gihe u Rwanda kimwe n’isi muri rusange twugarijwe n’icyorezo cya COVID 19, Abahinzi ba Kawa bo mu murenge wa Muko, Akarere ka Gicumbi, baravuga ko bakajije ingamba zo kwirinda, bagamije kudata umwanya na muto mu bikorwa byabo bya buri munsi byo kwita no kubungabunga Kawa .

Gitifu wa Muko Bwana Kayiranga Theobald (wambaye umupira w’umukara )asura abahinzi ba Kawa mu mirima 

Perezida wa Koperative Mayogi Coffee Madamu Niyomahoro Florence avuga ko ibikorwa byo kwita kuri Kawa birimbanije , akizeza NAEB umusaruro  ufatika .Mu butumwa aha abahinzi ba kawa agira ati “Muri iki gihe ndihanganisha abagizweho ingaruka  n’iki cyorezo kandi nsaba abahinzi ba Kawa gukomeza gutunganya kawa bubahiriza amabwiriza igihugu cyacy kitugezaho.”

Perezidante wa Koperative Mayogi Coffee Niyomahoro Florence n’abanyamuryango mu gikorwa cyo gutunganya kawa 

Madamu Niyomahoro akomeza ashimira abaganga  bakomeje kwita ku barwayi ba COVID19, ariko akizeza abafatanyabikorwa muri gahunda yo kwita kuri Kawa ko bataciwe intege n’iki cyorezo.

Agira  ati “ndizeza NAEB n’umufatanyabikorwa wacu Sustainable Growers ko turi gutunganya kawa  yacu twirinda n’iki cyorezo, tubizeza ko ikawa yacu uko yabonekaga ku isoko  na nyuma ya COVID19 izakomeza iboneke.”

Yongeraho ati “ubu turi guhirimbanira kugira ngo igumane ubwiza bwayo na nyuma ya COVID 19 abazayinywaho  bazakomeze kumva uburyohe bwa Kawa ya Mayogi .”

Akazi ko gutunganya kawa karakomeje ariko birinda COVID 19

Mu murenge wa Muko  haboneka inganda ebyiri zitunganya Kawa :Mayogi Coffee na Nyampundu  Coffee.

Abahinzi ba Muko barashishikaye mu gutunganya kawa 

Umunyamabanga nshingwabikorwa w’Umurenge wa Muko Bwana Kayiranga Theobald,yabwiye VALUE NEWS ko ibikorwa by’ubuhinzi  bitigeze bihagarara kubera COVID 19 ariko ko abahinzi basabwa kandi bahora bagirwa inama z’uburyo bagomba kwitwara bubahiriza amabwiriza yatanzwa na Leta muri gahunda yo kurwanya ikwirakwizwa rya COVID19.

Ati “ twuvikanye ko abakora mu ruganda  bose bagomba kwambara udupfukamunwa , kandi bakagira isuku bakaraba intoki neza kandi kenshi, abahinzi bazana kawa bagomba kwishurwa hakoreshejwe Mobile Money  cyangwa se amafaranga agashyirwa kuri konti zabo zo muri banki , ariko kandi bakanibuka kwizigamira mu kigega ejo hazaza”

Ngaya amayogi ya Burimbi ahera ikawa nziza cyane ya Mayogi Coffee 

Kugeza ubu muri uyu murenge wa Muko gusa umusaruro wa Kawa ugera kuri toni hagati ya 350 na 450 z’ibitumbwe  ku mwaka .Muri iki gihe umuhinzi arahabwa amafaranga 215 ku Kilo .

 

 

Leave a Reply

Your email address will not be published. Required fields are marked *