Dore uko  bamwe mu bagore bo mu Mujyi wa Kigali babona umusirimu  

Yanditswe na Bazubagira Djaria

 

Ijambo  umusirimu  rikunzwe   gukoreshwa  na  benshi mu banyarwanda, bashaka kuvuga umuntu ugaragara neza cyangwa  se usobanutse mu migirire ye.  Bamwe  mu bagore bo mu baganiriye na VALUE NEWS kuri iri jambo  bagaragaza ubusirimu  nko kugira ubutunzi abandi bakavuga ko ubusurimu  ari mu mutwe .

Mukamusoni Claudine umugore w’imyaka 35 akora muri Banki imwe mu Mujyi wa Kigali  avuga  ko ubusirimu  ntaho buhuriye nuko umuntu aba agaragara mu muhanda ; ati “ umusirimu nya musilimu umubonera  mu buryo bw’imibereho ye  ya buri munsi, niba afite umuryango ubirebera mu buryo ategura amafunguro iwe , uko umuryango we ubayeho , ndetse no bindi bice byose bigize ubuzima bwe .

Ingabire Happy  we  ati” abantu benshi bitiranya ubusirimu n’amafranga .  Hari igihe umuntu aba atunze amafranga menshi akoresha amavuta na  parfum  bihenze , yambara imyenda ihenze ndetse anagenda mu mudoka nziza  ariko wagera iwe ukabona  uko abana be barya cyangwa se bambara agahinda kakakwica”

Ingabire yongeraho ko  hari n’aho usanga abana bararwaye indwara ziterwa n’imirire mibi kandi ababyeyi babo bari  muri cya kiciro benshi  bita abasilimu.Ati “ kuri njye mbona kuba umusilimu ari mu mutwe”

Francine Uwamahoro nawe  yemeza ko  kugira amafaranga no kuba umusilimu  ntaho bihuriye kuko hari igihe ushobora kuba umukire ntube umusilimu .

Ngo “hari igihe ushobora no  kuba umukene ariko ukaba umusilimu kuko ubusilmu bugaragarira mu buryo bw’imibereho,kuruta uko bugaragarira ku  mubare w’amafranga utunze”

Uwamahoro atanga urugero rw’umugore wo mu cyaro  w’umuhinzi  wita ku mirire y’abana be akagerageza kubagaburira indyo yuzuye, mu butunzi bwe bucye ,akita ku burere bw’abana be ndetse no ku myigire yabo.  Ati “njye  uwo mwita umusilimu kuruta wa wundi wo Mujyi ufite amafranga menshi uhora agaburira abana be ifiriti na Pizza ubundi bakarenzaho fanta ngo kuko aribyo abana be bakunda.”

Manishimwe Nadia we avuga ko ubusirimu n’amafranga bigendana ,akavuga ko iyo ufite akantu {amafaranga} n’ubusilimu burizana . Ati “wasirimuka ute se nta mafaranga?  sindabona umukene wabaye umusirimu, iyo ufite amafaranga niyo ubwo busilimu utaba ubwifitemo ushaka abakozi bakagusilimura bakakwigisha kwambara , kwisiga , ndetse no guteka ku buryo ukubonye wese abona ko usirimutse .”

Umutoni Esther umwarimu mu ishuri ry’incuke aragira ati” Ubusirimu bugaragarira mu myitwarire ,mu mivugire no mu mikorere waba utunze waba udatunze ushobora gusirimuka.”

Umutoni akomeza agira  ati” umusirimu amenya gupanga igihe cye  uko kiba kingana cyoze akamenya umwanya agenera akazi n’umwanya agenera umuryango we , hari benshi mu babyeyi usanga gahumda zose barazihariye  abakozi “.Umutoni avuga ko ibi abihamya kuko ari kenshi ahura nabyo mu kazi akora ko kwigisha ho agira ati “ duhura nabyo cyane ukabona umubyeyi azanya umwana ku ishuri wareba imodoka asohotseho cyangwa se uko nyina asa,  yambaye imyenda ya marque gusa ariko umwana yagera mu ishuri yashaka kujya kuri toilette ugasanga yaje ku ishuri nta n’ikariso yambaye  cyangwa se yambaye amasogisi adasa !

Uyu mwarmukazi avuga ko iyo bagerageje kubibwira ababyeyi  b’abo bana  ngo aho kwigaya ahubwo usanga  barushaho kurakarira abakozi babo , ngo barabasebye .Ati “ hari igihe ubibwira umubyeyi we  akagusubiza ati  mfite umukozi w’indangare ndaza kumwirukana nshake undi”

Benshi mu bagore bo mu Mujyi wa Kigali bahuriza kuko utabona  umuntu agenda mu nzira ngo ngo uhite wemeza ko ari umusirimu  bitewe nuko umubona yambaye , akeye cyangwa yitwara mu nzira .

 

 

 

 

 

Leave a Reply

Your email address will not be published. Required fields are marked *