Muhanga:  Gufatanya ibibanza  kw’abacuruza  imboga  n’imbuto  bibangamiye  ingamba  zo  kurwanya  covid-19

Yanditswe na  Uwambayinema  Marie  Jeanne

 

Nyuma  y’uko   bahawe  iminsi  yo  gukoreraho  mu rwego  rwo  kwirinda ikwirakwizwa  rya  covid -19 ,bamwe  mu bacuruza  imbuto  n’imboga  mu isoko rya Muhanga   bahisemo  kujya  bafatanya  ikibanza  mu rwego   rwo  kugira ngo  bacuruze  buri  munsi  ibicuruzwa  byabo  bye kuhahombera  kuko ngo  ibyinshi usanga bipfa vuba.

Umwe  mu bacuruza  inyanya  muri  iri  soko utarashatse  kugaragaza  amazina  ye  avuga  ko ubusanzwe  iyo  uranguye inyanya  harimo izibora  cyangwa  zikameneka,  bityo ngo  nta kuntu  wasiba  umunsi umwe  nugaruka   uzasange  zikiriho ari nayo mpamvu   bafatanya ibibanza  na bagenzi  babo umwe  yaba afite inyanya undi agashyiraho  izindi  mboga ariko bose  bagakora  ntawe uhahombeye.

Agira ati  « niba  uyu munsi  iki gihande  cyakoze  ikindi  ntigikora  birasimburana  twe  rero ubwo  ushaka  aho  wihengeka  kwa  mugenzi  wawe  wakoze  nawe  ejo akazakwishyura gutyo  gutyo  ,kuko rwose abantu  ducuruza inyanya  zirabora cyangwa  zikameneka  wazagaruka  zarangiritse  zose

Iki  kibazo  kandi  kinafitwe  na   bamwe  mu bacuruza  imbuto  nabo bavuga  ko  usanga  zipfa  bakahahombera.Cyakora  ngo  abafite ibibanza  bibiri  bitandukanye  bo biraborohera kuko bituma  bacuruza  buri  munsi  abatabifite  nabo  bagashaka aho bihengeka.

Ku rundi  ruhande  ariko ubuyobozi  bw’isoko rya  Muhanga  bwo  ntibwemeranywa  n’aba bacuruzi  mu buryo bwo  gufatanya ibibanza  ngo  kuko ngo  hari ibindi  bibanza  biri  mu isoko  mu gice  cya ruguru  bakabaye  bakoreramo ariko ngo  bo  bakaba  baranze  kubijyamo.

Rukazabyuma  Emile  umuyobozi  w’iri  soko  avuga  ko  ubu buryo  bwo  gufatanya ibibanza  buteza akajagari   bikaba byanatuma  abantu  banduzanya  kuko umubare  w’abacuruza  n’abagura uba  wabaye  mwinshi  bakabyigana  kandi ngo ari  byo birindaga .

Agira  ati  « naraye  mbimenye  ko  mu mbuto  no  mboga  harimo  akajagari  ko gufatanya ibibanza  kandi  nibyo  twirindaga   kuko ikibanza  kiba  ari gito  ku bantu  babiri  ,icyakora  dufite ibindi  bibanza  22  byasagutse  kubyahawe  abacururizaga  mu muhanda  twabasabye kuba ari  byo bakoreramo  indi  minsi  batemerewe  gukorera  muri  bya  bibanza  bindi igihe  igice cyabo  kitakoze ariko banga kubijyamo  ngo  nta bakiriya  bahagera  ngo  ni kure».

Byagumuye  n’abacuruza  ibindi  basaba ko nabo  bakwemererwa  gufatanya ibibanza

Nk’uko  bitangazwa   n’abacuruza  imboga  n’imbuto   ngo  bahisemo  kwiyeranja  muri ubu buryo   kuko bari  babonye   abacuruza inyama  n’isombe   bemerewe  gukora  buri  munsi    ngo ibicuruzwa  byabo  bikangirika   bo  babisabye  ntibyemerwa  niko guhita  baikora  muri  ubu buryo.

Umuyobozi  w’isoko   rya  Muhanga  akomeza   avuga  ko  ibi  byatumye  yirirwa  ahamagarwa  n’abandi  bacuruza  ibindi  bintu  nabo  bamusaba kubareka  bagafatanya ibibanza  nk’uko  n’aba babikora  ari  nayo  mpamvu  avuga  ko birimo guteza  akajagari.

Agira ati «  mbere y’uko isoko ryongera gukora  twabanj  gukorana  inama  komite iyobora isoko  , abayobora   amazone  mu isoko , abayobozi  b’umurenge  ndetse   n’akarere  twemeranywa ku mikorere  uburyo  ibibanza  bihabwa numero   hamwe  hakaba  A  ahandi  B  ,bamwe  bagakora  uyu  munsi  abandi  ejo  kugira  ngo  tugabanye  umubare  w’abantu  mu isoko ,ibi rero  byazanwe  na  bariya kuko  bo bari  baramenyereye gucuruza  bui  munsi  bakumva  batasiba  none  bitangiye  gutuma  n’abandi  bashaka  gukora  nkabo».

Akomeza  agira  ati  « byazamutse   aho  abantu  bacuruza amafi  n’isambaza  basibye umunsi  umwe  bagaruka  bagasanga   byapfuye   babitweretse nk’abayobora  isoko dusanga  bakoze  buri  munsi  ntacyo  byakwica  kuko  n’ubundi  si  benshi  ni babiri  gusa  ,tubemereye  niko  n’abacuruza  imboga  basakuje  kandi  bo  ni benshi    ».

Uyu  muyobozi   w’isoko    avuga  ko iki  kibazo  nawe  amaze  kukimenya  ngo  yakigejeje  ku  bayobozi  b’umurenge   ngo   bakaba  biteganijwe  ko  bazahura  bitarenze  kuwa  kabiri  w’icyi  cyumweru   bagakorana  inama    yo  kureba  ikindi  bakora.

 

Leave a Reply

Your email address will not be published. Required fields are marked *