Musanze:Yakatiwe imyaka 20 y’igifungo kandi arakidegembya hanze

Yanditswe na Setora Janvier

Fazil umugabo w’imyaka 25 ,wavukiye mu mudugudu waMwali,Akagari ka Kigarama Umurenge wa Nyundo,Akarere ka Rubavu kuri ubu akaba atuye mu mudugudu wa Mubuga ,Akagari ka Rwebeya, Umurenge wa Cyuve ,Akarere ka Musanze.ku itariki ya 8 Gicurasi 2020 yakatiwe n’urukiko rwisumbuye rwa Musanze  igifungo cy’imyaka 20 ahamijwe icyaha cyo gusambanya umwana w’umukobwa w’imyaka 17 none akaba yidegembya mu maso y’abo yahemukiye.

 Mu rubanza  rwaregwamo uyu mugabo  Fazil  rwasomwe  mu ruhame rwa benshi, urukiko rwamukatiye iki gifungo kubera gusambanya umwana w’umukobwa wo  mu murenge wa Cyuve,Akarere ka Musanze ,hashize imyaka 2 .

Ni urubanza rwasubitswe ubugira kenshi hafi inshuro enye kubera ko uwaregwaga Fazil  yavugaga ko atagira umwunganira mu mategeko ariko  taliki ya 03 Werurwe 2020 ruraburanishwa kuko Fazil yari yamaze kubona umwunganira ariwe Me Habiyakare Ndwaniye Emmanuel.

Umucamanza Bizimana Innocent niwe waburanishije uru rubanza ,ubushinjacyaha buhagarariwe na Hagenimana Edouard.

Uregwa Fazil , ahakana ibyaha byose aregwa .Agira ati“ ibyo bandega simbyemera cyane ko n’uwo mwana bavuga ntamuzi kuko nibwo bwa mbere nakumva ayo mazina mu matwi yanjye.”

Kuwa gatanu, tariki ya 08/05/2020 nibwo uru rubanza  rwasomw.Urukiko rushingiye ku ngingo ya 133 y’itegeko nimero 68 /2018 ryo kuwa 30/08/2018 ryerekeye ibyaha n’ibihano muri rusange, rusanga Fazil  adahamwa n’icyaha cyo gukubita no gukomeretsa ahubwo ko icyaha cyo gusambanya umwana kimuhama  kubera ibimenyetso n’abatangabuhamya babajijwe, bityo rutegeka ko agomba gufungwa imyaka makumyabiri no gutanga amagarama y’urubanza angana n’ibihumbi makumyabiri (20.000 frw), abaregera indishyi bakaziregera.

Bishimiye imikirize y’ urubanza ariko bafite impungenge z’umutekano wabo

Umubyeyi w’umwana wasambanijw yabwiye VALUE NEWS ko yishimiye imikirize y’urubanza,  gusa ngo bafite impungenge z’umutekano wabo kuko uregwa yaburanye ari hanze na n’ubu akaba yidegembya.

Agira ati “ Nubwo urubanza rwatinze, dushimishijwe  n’imikirize yarwo kuko tubonye ubutabera ariko kandi dufite n’impungenge z’umutekano wacu kuko uwakatiwe imyaka 20 yidegembya mu rugo. Ashobora gutekereza igifungo yahawe akaba ashobora guhohotera na none uwo mwana cyangwa undi wese ufitanye isano nawe. Turasaba inzego z’umutekano ko zamufata agafungwa, niho twe nk’abakorewe icyaha twatekana.”

Undi muntu wakurikiranye urubanza ariko utashatse ko izina rye ritangazwa yabwiye VALUE NEWS ko bishimiye umwanzuro w’urukiko wo gufunga Fazil imyaka makumyabiri kuko ibyo yakoreye umwana atari byiza. Gusa ariko ngo bahangayikishijwe n’umutekano wabo nk’abatanze ubuhamya.

Yagize ati “Akenshi tumubona yigenzagenza hafi y’ingo zacu, tukayoberwa ikimugenza. Turasaba inzego z’umutekano ko zamufata akajya aho agomba kujya. Umuntu

umuntu wakatiwe n’urukiko imyaka 20 ntiyakomeza kwidegembya muri Sosiyete kuko icyaha yakoze gikomeye ndetse akaba ashobora gukora n’ibindi bintu bibi.

Umuvugizi wa Polisi mu Ntara y’Amajyaruguru Chef Inspector of Police (CIP) Alexis Rugigana yabwiye VALUE NEWS ko impungenge z’ aba baturage zumvikana ariko  ko Polisi itafata umuntu idafite impapuro zimufatisha zitangwa n’urukiko.

Yagize ati “ nka Polisi , mu nshingano zacu harimo no kureba ko amategeko yubahirizwa ntitwafata umuntu ngo tumufunge nta mpapuro z’urukiko zimufatisha dufite. Abo bafite impungenge nibagane urukiko rubahe impapuro zimufatisha, tumufate, tumufunge.

Uru rubanza rwari rwaradindijwe  nuko uregwa atari yakabonye  umwunganira mu mategeko  kuko ubwo yakoraga iki cyaha, yashinjwaga n’ikindi cyaha cyo gutwika ku bushake imodoka y’uwitwa Hategekimana Jean Pierre [urubanza yaburanaga afunzwe] ariko mu kuruburana aza kurutsinda , arafungurwa ari nayo mpamvu yaburanye uru rwo gusambanya umwana ari hanze.

Gusa itegeko riteganya ko uwaburanye urubanza ari hanze, agakatirwa igihano  cy’igifungo, amategeko ateganya ko hategerezwa iminsi mirongo itatu yo kujurira, yarangira atajuriye agafatwa akajya kurangiza ibihano, yajujira akaguma kuba aho yari ari.

Rigira riti “ Iyo uwaburanye urubanza ari hanze atsinzwe akajurira, igihe urubanza rwajuririwe rutaraburanishwa, uwatsinzwe  aguma kuba aho yari ari. Iyo atajuriye nyuma y’iminsi mirongo itatu iteganywa n’itegeko , arafatwa akajyanwa muri Gereza kurangiza ibihano.”

 

 

 

 

 

 

Leave a Reply

Your email address will not be published. Required fields are marked *