Burera : Mu byaro bamwe  ntibikoza  agapfukamunwa

 SETORA Janvier

 Hirya no hino mu  bice by’icyaro kigize akarere ka Burera , abaturage bahatuye ntibikoza  kambara agapfukamunwa ndetse no guhana intera  iyo bari kumwe. Mu myumvire yabo, baracyavuga ko icyorezo cya Covid-19 ari indwara y’abo mu mujyi. 

 Mu dusanteri  (Centre)  twa  Kanyirarebe, Gasagara, ahitwa kwa Mutabazi n’aho bita ku rukiko, hose ho mu  karere ka Burera  kuhabona umuturage wambaye agapfukamunwa  no tombola .

Abatuye muri  utwo duce bavuga ko  bituriye  mu cyaro kandi iyo ndwara idashobora kuhagera  kuko ngo ari indwara y’abakire batuye mu bipangu iyo mu mijyi nka Kigali.

Rucamumakuba Deogratias  yabwiye VALUE NEWS ati ” Icyo cyorezo cya Coronavirus  twumva bakivuga iyo za Kigali na Rusizi ariko hano iwacu ku Kanyirarebe nta gihari. Twakwambara utwo dupfukamunwa kubera iki? Nitwumva yageze mu Rugarama cyangwa mu Gahunga tuzatwambara.”

Ni mu gihe mugenzi we Bigirabagabo Louis agira ati twebwe duturiye Pariki y’ibirunga, ntaho twahurira n’icyorezo cya Covid-19 kuko na Ebola yarateye batubwira ko tugomba kwirinda ngo tutayandura ariko ntiyigeze itugeramo. Ku bijyanye n’udupfukamunwa , nka njye nakambara nten’umukuru w’ubudugudu ntako yambaye. Ntituzi n’aho batugurira ahubwo twumva bavuga ko duhenda.”

Nubwo batambara  udupfukamunwa  usanga  badutwara  mu mifuka cyangwa mu masakoshi ku bagore  bakavuga ko tubabangamira.

Umuyobozi w’Akarere ka Burera Madame  Uwanyirigira Marie Chantal yabwiye VALUE NEWS ko bishoboka ko hari abaturage batarumva ububi , ubukana  n’umuvuduko bw’icyorezo cya COVID-19 ariko ko ubuyobozi bukomeje gushyira imbaraga mu bukangurambaga  biciye mu bajyanama b’ubuzima n’urubyiruko rw’abakorerabushake aho agira ati ” Dukomeje ubukangurambaga twifashishije abajyanama b’ubuzima  n’urubyiruko rw’abakorerabushake aho kugeza ubu Centre zose z’ubucuruzi bahari  bakaba badufasha  kwigisha abaturage kwambara neza udupfukamunwa, gukaraba neza intoki n’isabune n’amazi meza kandi abari kumwe bagahana intera ya Metero imwe nibura ndetse  hakaba hari n’abapima abinjira  muri utwo dusanteri bose.”    

                 

Uyu muyobozi  w’akarere Uwanyirigira Marie Chantal yakomeje abwira VALUE NEWS ko  mu byaro udupfukamunwa badufite ahubwo ko badutwara mu mifuka kubera imyumvire  yabo ikiri hasi.

Ati ” Abenshi mu byaro badutwara mu mifuka kuko batari bumva akamaro katwo  cyane ko hari n’abatwambara  nabi. Byose birasaba gukomeza ubukangurambaga , uwumva ko kabangamye,  akabyihanganira yagera mu bandi akakambara ndetse no guhana intera  bakabyubahiriza, bityo uwo binaniye akigumira mu rugo.”

Madame Mukanyirigira Marie Chantal yasabye abaturage gukomeza kubahiriza amabwiriza birinda gusubira inyuma mu ntambwe bamaze gutera  kuko byatuma gahunda ya “Guma mu rugo” ibagarukira. Aha, arabasaba guhindura imyumvire bumva ko ibyemezo byo gufungura ingendo n’ibikorwa bimwe na bimwe bidasobanuye ko ko icyorezo cyarangiye ahubwo ko kigihari , bityo buri wese akabigira ibye.

 

 

 

Leave a Reply

Your email address will not be published. Required fields are marked *