Nyamagabe :Water Aid yahagurukiye gufasha abaturage  gukaraba intoki

Yanditswe na UMUHIRE Valentin

 

Nubwo ibikorwa byo kwegereza abaturage amazi meza  no kwita kuisuku n’ isukura aribyo by’ibanze by’umuryango mpuzamahanga utari uwa Leta Water Aid , muri iki gihe u Rwanda ndetse n’ isi yose byugarijwe n’ icyorezo cya COVID -19 ngo ibikorwa byawo mu turere bakoreramo bigiye kwibanda cyane cyane mu gufasha abaturage mu gikorwa cyo gukaraba intoki birinda ikwirakwizwa rya COVID-19

Ubu bukarabiro rusange bugezweho nibwo bugiye kubakwa mu bice bitandukanye bya Nyamagabe na Water Aid 

Mu nama murikabikorwa Water Aid iherutse kugirana n’abayobozi b’Akarere ka  Nyamagabe  kamwe mu turere  bakoreramo,  hamuritswe ibikorwa byakozwe mu mwaka ushize w’ ingengo y’ imari ndetse n’ ibigiye gukorwa muri uyu mwaka .

Umuyobozi w’Akarere ka Nyamagabe Uwamahoro Bonaventure  avuga ko  muri ibi bihe  bikomeye bya COVID 19  Water aid yigaragaje cyane mu gufasha ubuyobozi guhangana  nacyo ,ibi bikaba biza byiyongera  ku bindi bikorwa bari basanzwe bakora mu karere birimo kugeza amazi meza ku baturage, ku bigo by’amashuri n’amavuriro,gufasha abaturage kwiyubakira ibikorwaremezo by’isuku  binyuze mu kwizigamira mu matsinda.

Umuhuzabikorwa bya Water Aid mu karere ka Nyamagabe Madame Jeannette Murekatete avuga ko kugeza ubu amatsinda 637  yamaze gukorwa muri Nyamagabe   aho abaturage bizigamira ndetse bakagurizwa bakabasha kubaka ubwiherero busobanutse mu ngo zabo ndetse n’ ibindi bikorwa  remezo birebana n’ isuku .

Muri iyi minsi u Rwanda kimwe n’ibindi bihugu rwugarijwe n’icyorezo cya covid 19 Water Aid yafashije aka karere mu bijyanye no gusakaza ubutumwa mu baturage  aho buri murenge w’aka karere wahawe ibyuma ndangururamajwi bikoreshwa mu gusakaza ubutumwa  icyarimwe mu bantu benshi.

Banabafashije kandi mu gutanga ubutumwa  bwo kwirinda no kurwanya COVID 19 binyuze mu bitangazamakuru  nka radio  dore ko ari nabwo buryo bwiza bwatoranijwe bwo gufasha abaturage gusobanukirwa n’ibirebana n’icyorezo kandi batavuye mu ngo.

Uretse nibyo kandi muri iyi nama  yahuje ubuyobozi bw’ akarere ka Nyamagabe  n’ubuyobozi bwa Water Aid tariki ya  04 Kamena 2020 ku cyicaro cy’aka karere,ubuyobozi bw’akarere bwanamurikiwe  ibikoresho by’isuku  birimo litiro 1960 z’isabune yo gukaraba ndetse na alcool yo gusukura intoki (hand sanitizer )litiro 1310 bikazashyikirizwa ibitaro, ibigo nderabuzima 19,inkambi y’impunzi z’abanyecongo ya Kigeme ndetse  na Gereza ya Nyamagabe .

Muri uyu mwaka w’ingengo y’ imari Umuyobozi w’akarere  ka Nyamagabe yasabye uyu mufatanyabikorwa ko  ku ikubitiro bakwibanda  ku bikorwa byihutirwa birimo  kubaka ahantu ho gukarabira  intoki hahurirwa n’abantu benshi, ahemejwe  hagiye kubakwa  harimo ku isoko rishya rya Nyamagabe riri hafi gutahwa , kuri gare bategeramo imodoka , muri centre ya Gasarenda  ndetse no mu  gice cya Kaduha .

Umuyobozi w’ Akarere ka Nyamagabe ari kumwe  n’ itsinda ry’abakozi ba Water Aid  basura ahagiye kubakwa ubukarabiro rusange 

Umuyobozi ushinzwe ibikorwa bya Water Aid mu Rwanda Bwana Jean Paul Mbarushimana ashimira imikoranire n’akarere ka  Nyamagabe , akavuga ko ubu bagiye gushyira ingufu no mu kubaka aho abantu bakarabira mu  bigo by’amashuri k’uburyo amashuri azongera gufungura  byaramaze kuhagera .

Leave a Reply

Your email address will not be published. Required fields are marked *