Muhanga :  Haracyari  imbogamizi  mu kwishyura  hakoreshejwe  ikoranabuhanga

Yanditswe na Uwambayinema  Marie  Jeanne

 

Bamwe  mu bacuruzi  n’abakiriya  mu karere  ka Muhanga ,  bavuga  ko  bagifite imbogamizi  mu kwishyura  hakoreshejwe  ikoranabuhanga  .  Uwishyuye  akoresheje  telefoni  mu buryo  bwa  Mobile  money  asabwa  kurenzaho  n’ayo  gukata  umucuruzi  agiye kuyabikuza .Ni mu gihe  Leta  isaba  abaturage  ko  mu rwego  rwo kwirinda  no gukwirakwiza  icyorezo cya covid-19 bakwiye kwitabira gukoresha uburyo  bw’ikoranabuhanga.

Nsigayehe  Laurent   utuye muri  aka gace  ,avuga  ko  yari  afite  amafaranga  kuri  telefoni ye  ubwo  yajyaga  guhaha   yasabye umucuruzi  kumwishyura  kuri  telefoni ,   nawe  amubwira  ko  ari  burenzeho  ayo  bazamukata  agiye kuyabikuza .Yaremeye  arayatanga   kuko  yabonaga nta kindi  yari bukore. Agira ati  ‘’ nari  mpashye  ibintu  by’amafaranga  ibihumbi  makumyabiri na bitanu (25.000frw  )nagombaga  kuba  ari  yo  muha kuri telefoni kuko  kohereza  ni ubuntu  ariko  byansabye  kurenzaho  ayo  baza  kumukata  ,kuko  yambwiraga  ko  nawe   muhaye  ariya  bakayamukata  yaba  ahombye  kandi  ngo  nta sim card  imwe  batishyura  agira ‘’.

Umwe  mu bacururiza  muri  uyu  mujyi  avuga  ko impamvu  hari bamwe batari bitabira  gukoresha  ikoranabuhanga   atari ubushake  bwabo. Ahubwo   ngo  baracyahura  n’imbogamizi   zo  kuba  batarabona  sim card  zikoreshwa  muri  uku kwishyurana  hakiyongeraho  no kuba  batanarisobanukiwe  kuko nta mahugurwa   bahawe  y’uburyo  barikoresha. Agira ati  ‘’ niba  ikilo  cy’isukari kigura amafaranga  900 ,ntabwo  umukiriya  azayanyoherereza  kuri telefoni  ngo  ninjya  kubikuza  bankate ijana  mbikuze  800 nzaba namaze guhomba .Ibyiza  n’uko  yayampa  mu ntoki  nkamenya ko  anyishyuye  ,ufite ayo kurenzaho  akayaguha kuri telefoni urayakira ariko urumva atayarengejeho wahomba ndetse bikabije’’.

Uyu  mucuruzi  kandi  akomeza  avuga  ko  bagifite  indi mbogamizi  y’uko  batanashobora kwakira  amafaranga  kuri telefoni incuro  zirenze icumi , ndetse  ko hari abajya kwaka  sim  card zabugenewe  zizwi nka  Momo  pay  ku bakoresha  MTN ariko bagatinda  kuzibona . Agira ati  ‘’ turacyanafite ikibazo  iyo  abantu bakwishyuye  bakoresheje  ikoranabuhanga  udashobora kwakira  abarenze icumi  ,nka twe  ducuruza  ibintu  bitandukanye  byo  kurya  ,ibikoresho by’isuku  duhahirwa n’abantu  benshi  ku munsi    iyo  wa mubare warenze  turongera  tukayakira  mu ntoki’’.

Ni ikibazo  kandi  kinafitwe  n’abakora  umwuga  wo  gutwara  abantu  kuri  za moto  bavuga  ko  bifuza  kubahiriza  ingamba  zo  kwirinda  covid -19  ariko bakuzuza  umubare  w’abantu icumi bikarangira  basubiye  kwakira  amafaranga  mu ntoki  .

Izi  mbogamizi  zakorewe  ubuvugizi

Kimonyo  Juvénal  perezida  w’urwego  rw’abikorera  mu karere  ka  Muhanga  , yemeza  ko  abacuruzi  bakanguriwe  gukoresha  uburyo  bw’ikoranabuhanga  kandi bazi  neza  ko bizabafasha  kwirinda  iki cyorezo  .Kuba  amafaranga acyakirwa  mu ntoki , ngo  biterwa  nuko  bitahita  bicika  ako  kanya  ndetse  n’imbogamizi  zagiye  ziboneka  mu gukoresha  ikoranabuhanga  . Agira ati  « twebwe  icyo  dushyize  imbere  ni ukwishyurana  hakoreshejwe  ikoranabuhanga  ariko  habonetsemo  imbogamizi  z’uko kwishyurwa  kuri mobile money  bagakatwa  no kutarenza  ziriya ncuro cumi .   Twabikoreye ubuvugizi  mu nzego  zidukuriye  ku ntara no ku rwego  rw’Igihugu  turacyategereje igisubizo ,kuko  ziriya sosiyete  nazo  ni abikorera kandi  turizera ko ku bufatanye bizagenda neza .’’Ku bantu  basabye  sim  card  zidakatwa z’abacuruzi  uyu  muyobozi  avuga  ko   agiye kuvugana  na MTN  akumva  igihe  bisaba  ngo  uwayisabye abe  yayibonye.

Nubwo  hari  abavuga  ko  batarakoresha  ikoranabuhanga , bamwe  mu bacuruzi  babukoresheje  bavuga  ko  ari byiza  kuko bibarinda  kwakira amafaranga mu ntoki  dore ko kuyahererekanya  bishobora  gutuma  bandura  .

Icyakora  ngo  bishobora  gutinza  umukiriya  wabikoresheje  yishyura  igihe impuzanzira ( network  )zitameze  neza   ubutumwa  bugufi  bwerekana  ko yishyuye  bugatinda  kuhagera .

 

Leave a Reply

Your email address will not be published. Required fields are marked *