Musanze: Home Inn,Gorilla Hotel na Touristic Lodge ziri mu kato kubera COVID-19

Yanditswe na UMUHIRE Valentin

 

Hoteli eshatu zo mu Mujyi wa Musanze kuva  mu ijoro ryo ku wa gatandatu tariki 13 Kamena 2020 ziri mu kato  kubera ko zanyuzwemo n’abantu nyuma bakaza gusanga  baranduye COVID-19.Kuva ayo makuru yamenyekana  zahise zishyirwa mu kato , abakozi bazo  n’abageze muri izo Hotel bakaba bari gusuzumwa   ngo barebe ko nabo baba barandujwe n’abo bantu  ndetse no gukurikirana  abo baba barahuye nabo bose .

Mu butumwa bwakwiriakwijwe ku mbuga nkoranyambaga mu gitondo cyo ku cyumweru tariki ya 14 Kamena  bwavugaga ko  “Central Command Post “ ari rwo rego rushinzwe gukurikirana ibirebana n’ iki cyorezo cya COVID-19 yatanze amakuru ko hari abantu batanu baje kugaragara ko banduye COVID-19 kandi ko banyuze muri izo Hotel twavuze haruguru ku matariki ya 05-06 Kamena 2020.

Ibi byatumye rero inzego zihinze gukurikirana iki cyorezo zifata icyemezo cyo kuhafunga  kugira ngo habanze hakorerwe igangahurwa (decontamination) kugira ngo hatagira abandi bahandurira .

Ni muri urweo rwego rero  abakozi b’ izi hoteli ndetse n’abandi bantu bose bazinyuzemo n’abazisanzwemo nyuma yaho amakuru amenyekanye ubu bari gukurikiranwa n’abaganga  bari mu kato  ndetse no muri izo hotel hakaba hari guterwamo imiti

Umuyobozi w’akarere ka Musanze, Nuwumuremyi Jeannine ari nawe ukuriye command Post y’Akarere ka Musanze yameje aya makuru avuga ko igikorwa cyo gusuzuma abageze muri izi hoteli gikomeje nyuma y’uko iki kibazo kigaragaye.

Ahabonetse umurwayi igikuba kiracika ariko ingamba  zifatwa  nyuma yuko umurwayi abonetse ntizikwiye guca igikuba

Umukozi ushinzwe imikoranire n’ itangazamakuru muri Minisiteri y’ Ubuzima Julien Mahoro  nawe yemeza aya makuru ariko agahumuriza abaturage  by’ umwihariko abanya Musanze ko nta gikuba cyacitse .Yabwiye VALUE NEWS ati “aya makuru ni ibintu bisanzwe  bikorwa iyo hari uwabaye positive bikagaragara ko hari aho yanyuze  ku buryo yahasiga ubwandu, harafungwa hakabanza hagakorerwa decontamination kugira ngo hatagira abandi bahandurira .”

Uyu mukozi wa Minisiteri y’Ubuzima yakomeje avuga ko kugangahura cyangwa “decontamination” ari igikorwa kimara  amasaha make kuko aba ari ugutera umuti gusa , ariko ko n’abakozi ndetse n’abandi bose bakekwa ko baba baranyuze aho hantu hagaragaye ko hanyuze abaffite ubwandu  nabo baba bagomba gupimwa kugira ngo nabo  bataba barandujwe n’umurwayi wahanyuze  bityo nabo bakanduza abandi .

Umuyobozi w’Akarere ka Musanze nawe akaba ahumuriza abaturage ahubwo asaba ko barushaho kwirinda bubahiriza amabwiriza .Ati  “Byagaragaye ko hari abantu bari banduye Coronavirus bahanyuze…. Icyo nabasaba cya mbere ni ukwirinda. Kugira ubwoba ntacyo byatumarira tutirinze. Amabwiriza arahari kandi arasobanutse nibayakurikize bakore ibyo bagomba gukora. Bambare agapfukamunwa, bakarabe  kenshi ubishoboye agendane umuti wo gukaraba. »

Zimwe mu ngamba zifatwa iyo byagenze gutya  harimo gushakisha  abahuye n’abarwayi no kureba niba abo nabo nta bandi bahuye nabo, gutera imiti mu mazu cyangwa amamodoka bagendagamo, gufata ibizamini, gushyirwa mu kato , kuvurwa aho bibaye ngombwa n’ izindi ngamba .

Ibi rero ngo ntibikwiye guca abanya Musanze intege ahubwo bakwiye gukomeza gukaza ubwirinzi bubahiriza amabwiriza ya Minisiteri y’Ubuzima .

 

Leave a Reply

Your email address will not be published. Required fields are marked *