Musanze  : Abakoze ikizamini cy’ubwarimu  ni inshuro  zisaga  15 abakenewe

Yanditswe na Setora Janvier

 

 Imbaga y’abantu  biganjemo  urubyiruko rw’abahungu n’abakobwa bageze kuri 1067 bari ku rutonde rwemejwe n’akarere ka Musanze  batangiye ibizamini byo kwinjira mu mwuga w’uburezi mu gihe mu karere ka Musanze hakenewe abagera kuri 67.

Aba bari gukora ibizamini bibumbiye mu cyiciro cya kabiri cyatangiye ibizamini mu Rwanda hose  kuri uyu wa kabiri, tariki ya 14/ 07/2020 kuko icyiciro cya mbere  cy’abakoze ibizamini  cyakoze kuwa 10 /12/2019.

Umuyobozi  w’ikigo cy’igihugu gishinzwe uburezi (REB)  Dr. Ndayambaje Iréné  avuga ko  impamvu nyamukuru yo  gukoresha ibizamini muri ubu buryo   harimo kwirinda ibyuho  byakunze kugaragara hirya no hino mu gihugu , ubwo ibizamini  by’abarimu  byakoreshwaga n’urwego rumwe .

Kuri ubu ibi bizamini birakoreshwa n’ inzego zitandukanye   zirimo: Ubuyobozi bw’akarere, Urwego rwa  REB, n’ inzego z’umutekano , byongeye kandi  ibyo bizamini bitegurwa na Leta ndetse bigakosorwa  na Leta nkuko bikorwa ku bizamini by’abana barangiza amashuri abanza n’ayisumbuye.

Dr. Iréné Ndayambaje , avuga  ko  mu gihugu  hose havuyemo akarere ka Rusizi ka kiri mu kato kubera a icyorezo cya Covid-19 , mu Rwanda hakenewe ibihumbi bisaga 28.000   by’abarimu bazahita bihabwa imirimo  mu gihe abandi bazasigara  , bazakomeza  kuba ku rutonde rw’abarimu  bazajya  bafatwamo abagomba gusimbura abageze mu zabukuru cyangwa abitabye Imana, bitabaye  ngombwa ko hongera gukoreshwa ibindi bizamini. Kuri ubu REB izafata abarimu ibihumbi 35.

Umuybozi wa REB  avuga ko  Gukoresha ibizamini bimwe mu gihugu hose , biri  mu rwego rwo kurambagiza abarimu baza mu kazi bujuje ibipimo ( Standard)  buri wese anyuze muri ako kayungiro.”

Dr. Ndayambaje Iréné, yabwiye  VALUE NEWS  ko  mu burezi hakenewe abasaga 28.000 kugira ngo hakemurwe  ikibazo  cy’ubucucike  mu mashuri ,cyane ko ireme ry’uburezi ritagerwaho umwarimu agifite  abana benshi mu ishuri.

Ati ” Abana bato benshi bari imbere  ya mwarimu , bigorana kubakurikirana. Bityo, bigenze neza twifuzaga ko buri mwarimu  yagira nibura abana bari hagati ya 46 na 52.”

Gusa uyu muyobozi wa REB  avuga ko   kubera  icyorezo cya COVID-19  cyakomye mu nkokora  imyigire y’abana mu mwaka w’amashuri 2020, abarimu bifuzwa  bashobora  kurenga mu ntangiro z’uyu mwaka w’amashuri ugiye gutangira  kubera umubare munini w’abana bagomba gutangira mu wa mbere w’amashuri abanza.

Aha ni naho ahera avuga ko nyuma  y’iki cyiciro  hazashyirwaho indi gahunda yo gukoresha ibindi bizamini ndetse ko n’aba bari gukora muri iki cyiciro uzatsinda  azashyirwa ku rutonde rw’abarimu  b’umwuga  ariko abazatsindwa bakazongera  gukora.

Umuyobozi w’akarere ka Musanze Nuwumuremyi Jeanine  yabwiye  VALUE NEWS ko  iyi gahunda  ije  ihurirana n’iyubakwa  ry’ibyumba by’amashuri  n’ishyirwa mu kazi ry’abarimu aho muri Musanze hakenewe abarimu 67  mu 1067 banditse babisaba  mu gihe hari kubakwa ibyumba  by’amashuri 622 mu karere.

Bamwe mu bakoze ibi bizamini bishimiye uburyo byakozwemo

Hari abakoze ibizamini babwiye VALUE NEWS ko bishimira ubu buryo bushya REB yashyizeho bwo gukoresha ibizamini kuko ngo buzaca ingeso yo gutanga ruswa n’ikimenyane.

Tuyikunde Valens ni umwe muri bo. Yagize  ati” Ibi REB yakoze ni byiza kuko uzatsinda, azaba yakoresheje ubumenyi bwe  kurusha uko twakoraga mbere  kuko akarere katangaga ibizamini  bigatangirwamo ruswa cyangwa bigakoperwa ariko kuri ubu  uzatsindwa ntawe azarenganya , azabyakira.”

Mugenzi we waturutse mu karere ka Burera  Habumunezero  Jean Claude wwe ati « ibi ni byiza kuko twakoze ikizamini cya Leta ntabwo twakoze bya bindi byo mu turere , twahuriragamo n’utubazo twa ruswa n’ibimenyane . »

Dr. Ndayambaje Irene  avuga ko  mu ntangiro z’uyu mwaka wa 2020, mu Rwanda  habarurwaga  abarimu  bo mu mashuri abanza n’ayisumbuye bagera ku bihumbi mirongo itandatu  na birindwi (67.000) harimo abasaga ibihumbi mirongo ine (40.000) bo mu mashuri abanza

Leave a Reply

Your email address will not be published. Required fields are marked *