Ruhango: Hari  abaturage  bakinyuranya  n’amabwiriza   yo  kwirinda  covid-19

Yanditswe na Uwambayinema  M.Jeanne 

 

Mu murenge  wa  Kinazi  mukarere  ka  Ruhango  ,ni hamwe  muhakigaragara  abaturage  bacyenga  bakacuruza  inzagwa  ,nyamara  bavuga  ko  babujijwe  kuzenga  no  kuzicuruza    muri iki gihe  cya  corona  kuko uwo  bafashe  arabihanirwa  agacibwa  amande .

Niyitegeka  Evode  utuye mu kagari ka  Rutabo   muri  uyu  murenge  avuga  ko    yari  asanzwe atunzwe  no  kugura  ibitoki  no gukodesha   insina  agatara   ibitoki akenga  inzagwa  akaziranguza  mu basanzwe bafite  utubari   tuzicuruza.

Uyu  mugabo avuga  ko   yafashwe  yazenze  agacibwa   amande  akanabifungirwa  kuko  yari  yanyuranyije  n’amabwiriza  yo  kwirinda  covid-19  abuza  utubari  gufungura.

Agira ati  ‘’ basanze  nahishije urwagwa  banca  amande  y’ibihumbi  300  ndete nanafungiwe  mu kigo  cy’inzererezi  cya Ruhango   maramo  ukwezi  n’iminsi itatu  naho ubu  nta  muntu  ugicuruza  urwagwa  cyeretse  Bralirwa  niyo  mbona  igerageza’’.

Uyu  muturage  avuga  ko  ubu  ibitoki  birimo  kwangirikira  mu milima  bipfa  ubusa  kuko  n’umuturage  wahishije  urwagwa  akiyengera  iyo  kunywa  mu rugo  ayijyana  ku gishanga.

Agira  ati’’ ubu turabitema  tukabishyira  mu nzu  abana  bakirira  imineke  ariko  n’imitobe  ntiyemewe  no kuyenga  ,nkanjye  nari  mfite  inguzanyo  nafashe  muri  banki  yo  gukoresha  nishyura  ibihumbi  40 buri  kwezi  birakomeye  kwishyura  amafaranga  udakora’’.

Ndahayo  nawe  uhatuye avuga  ko  mu mpera  z’ukwezi  kwa 6  ubwo  yari  yenze  urwagwa  ubuyobozi  bw’umurenge  na  polisi  ngo  baje kuyimena  bamumenera  amajerekani  5  bamuca  n’amande  y’ibihumbi  50.

Agira  ati’’ ubu  abaturage  barakangaranye  nta muntu  ucyenga  inzoga  kandi  nizo  twengaga  tukazikuramo  amafaranga  ya  mituweli  , ntiwakwenga  umutobe  ngo  uwubonere  isoko  haba  mu kagari  kacu  cyangwa  mu murenge  wose nta  n’isoko  ry’ibitoki  dufite ngo  wenda abe  ari  nabyo  tugurisha’’.

Nsanzabandi  Pascal  umunyamabanga  nshingwabikorwa  w’umurenge  wa  Kinazi  avuga  ko ikirimo  ari ukwitiranya  amabwiriza  yo  kurwanya  no  kwirinda  covid-19  kuko  ngo  n’abo  bahannye  ni  abaturage  bahinduye  imikorere  bakimurira  utubari  mu ngo  ariko ubundi  kwenga  urwagwa  rwo kunywa  umuturage  yiyengeye  ibitoki  bye  ntibibujijwe.

Agira ati’’ abo  twahannye  bose  ntawahanwe  adafatanywe  abantu  benshi  banywera  iwe  ,amabwiriza  arasobanutse  utubari  turafunze  nuwayenze  ayifite  mu rugo  iwe  ari umuturage  wiyengeye  igitoki  cye  ,umuntu  akaba  yajyana  agacuma akayigura  akayitahana  iwe  nta  kibazo  ariko  usanga  bicaye  ari  benshi  mu rugo bakahahindura  akabari  kandi  ntibyemewe’’.

Uyu  muyobozi  kandi  avuga  ko  abaturage  bemerewe  kwenga  umutobe  kuko  ku  masoko  yo  muri  uyu  murenge  uhacururizwa.

Hari  abaturage  bavuga  ko   hari abajya  kunywera  mu mashyamba  ndetse  no  mu bishanga  ubuyobozi  bwaza  kubafata  bagahita  biruka .

Nubwo  bamwe  mu bazipima  bemeza ko  babiretse  nyuma  yo  guhanwa  hari abaturage  bavuga  ko  bibaza  impamvu  abacuruza  inzoga zipfundikiye  bo  bazicuruza  bkurikije  amabwiriza  yo  kwirinda  ,bakaba  basaba  ko  abapima  urwagwa n’ibigage   nabo  bakomorerwa  bakabicuruza  abantu  birinze.

Mu kiganiro aherutse  kugirana  na radiyo  Rwanda  Dr  Nsanzimana  Sabin  umuyobozi  w’ikigo  cy’Igihugu  gishinzwe  ubuzima  , yavuze  ko  bitashoboka  ko  utubari  twafungurwa  kuko  bigoranye  kunywa  abantu  birinze.

Harimo  ko  abanywa  bisaba kuba  batambaye  agapfukamunwa  mu gihe  amabwiriza  asaba  ko  abaturage  bagomba kwambara  agapfukamunwa  igihe  cyose  umuntu  agiye  ahantu  hateraniye  abantu  benshi.

Ikindi  ngo  nuko  bigoranye  guhana  intera  igihe  umuntu  ari  mu  bandi.

 

Leave a Reply

Your email address will not be published. Required fields are marked *