Kudafungira abantu amazi mu gihe cya COVID-19 ntibitanga uburenganzira bwo kutayishyura-Muzoora

Yanditswe na UMUHIRE Valentin

 

Bamwe mu baturage bakoresha amazi atangwa n’ikigo cy’igihugu gishinzwe amazi, isuku n’ isukura   WASAC  kuri ubu baremerewe n’uburyo iki kigo kiri kubafungira amazi mu buryo butunguranye  nyuma yuko bakigiyemo  umwenda uremereye kubera icyorezo cya COVID-19.Magingo aya  bari kwishyurizwa icyarimwe amafaranga  y’amazi yo kuva mu kwezi kwa gatatu kugeza mu kwa karindwi 2020, utabashije kuyishyura agahita afungirwa amazi .

Abaturage baganiriye na VALUE NEWS bavuga ko ubwo icyorezo cya  COVID-19 cyageraga mu Rwanda mu kwezi kwa Werurwe 2020,bishimiye imikoranire myiza bagiranye na WASAC kuko itigeze ibakupira amazi  kabone n’ubwo ubushobozi bwo kwishyura  bwari buke bitewe n’icyorezo .

Gusa ariko kuri ubu hari bamwe  baheruka amazi  mu byumweru bibiri bishize bitewe nuko  bari kwishyuzwa akayabo k’amafaranga y’amazi bakoresheje kuva mu kwezi kwa gatatu .

Umwe mu baturage bo mu kagari ka Rwebeya, Umurenge wa Cyuve  mu karere ka Musanze  yabwiye VALUE NEWS ati “ mu gihe cya COVID-19  rwose WASAC yarakoze  idufasha kubona amazi  kandi iratwihanganira  bityo tubasha no kwirinda icyorezo kuko  twari dufite amazi  menshi  yo gukaraba intoki .Ariko ibyo bakoze muri aya mezi uko ari atatu  birasa n’ibigiye kuba imfabusa kuko ntawe ugikaraba intoki,amazi yavahe ko bayafunze ?“

Kuri ubu ingo zimwe na zimwe  cyane cyane iz’abaturage batishoboye  hirya no hino mu gihugu nta mazi zifite  bitewe nuko zabuze ubushobozi bwo kwishyura  bakabafungira.

Murangwa Egide wo mu murenge wa Nyakabanda mu Mujyi wa Kigali ati “ banzaniye inyemezabwishyu  y’ibihumbi 28 ngo ni iy’amezi ane , barangije  badukupira amazi ubu tugiye kumara  icyumweru  tudafite amazi mu rugo  ngo keretse tubanje kwishyura ayo mafaranga , ubu se koko  nubwo wenda twavuye muri gahunda ya guma mu rugo  abantu bakongera kujya gushakisha , aya mafaranga barabona nayishyurira rimwe nkayakura he ?”

Mugenzi we  Kayigire we asanga hari uburyo bari bakwiye gushyiraho bwo kwishyura ariya mafaranga mu byiciro .Ati “ nubundi badusabaga ko tuboherereza ubutumwa bugufi kuri telefoni tugaragaza imibare iri muri konteri y’amazi , ntibagakwiye rero guhita batwishyuriza icyarimwe  tutiteguye  kuko n’ ubundi icyatumye tutabasha kwishyura kiriya gihe kiracyahari “

Uyu mubyeyi asanga WASAC yari ikwiye kumvikana n’abakiliya bayo  uburyo bwo kwishyura umwenda bayibereyemo kubera COVID-19 aho kwihutira gukupa amazi kandi icyorezo kitararangira .

Umuyobozi mukuru w’ikigo gishinzwe gukwirakwiza amazi Muzoora Aime yabwiye VALUE NEWS ko abaturage bakwiye guhindura imyumvire kuri WASAC bityo bakubahiriza inshingano zabo kugira ngo akazi kagende neza .

Ati “ntidukupira umuntu muri COVID 19 ariko ntibivuze ko atagomba kwishyura .Mu gihe cya COVID19 twagiye dufasha abantu bakatwoherereza imibare iri muri mubazi zabo hanyuma tukababwira kwishyura bakoresheje ikoranabuhanga, ababikoze ubu nta kibazo bafite, ariko kandi nanone abatarabikoze bigwijeho umwenda ari nacyo kibazo bafite uyu munsi.bagomba kwishyura rero kuko turi ikigo cy’ubucuruzi “

Aime Muzoora avuga ko igihe  cy’imbabazi bari barahaye abafatabuguzi  cyarangiye nk’uko abantu benshi bamaze gusubira mu mirimo bityo bakaba bagomba kwishyura amazi  nk’uko bisanzwe bitaba ibyo bagafungirwa .

Gusa atanga agahenge kubabikeneye ko igihe usanze nta bushobozi bwo kwishyura  wasaba kwishyura umwenda ufite mu byiciro.Ati “Gukupira abantu amazi siyo ntumbero yacu, ariko iyo bibaye ngombwa turabikora .Ubushakashatsi bwagaragaje ko na mbere ya COVID19 abafatabuguzi bacu abenshi bishyura ari uko twaje kubakupira  nyamara siyo nshingano yacu y’ ibanze .Igihe umuntu abona afite impamvu zituma atabasha kwishyura arasaba tukamwemerera kwishyura mu byiciro bitatu kandi hari ababikora “

Umuyobozi mukuru wa WASAC avuga ko kenshi bajya gukupa ari uko umuntu  amaze iminsi hafi 30 ahawe inyemezabwishyu (facture ) atishyuye .Ati “harya ubwo ni iki tudakora koko”

Mu duce dutandukanye tw’igihugu abaturage bavuga ko babangamiwe cyane n’uburyo WASAC iri kubishyuza ndetse no gukupa amazi, bakavuga ko nta gikozwe bishobora kugira ingaruka  zikomeye cyane cyane muri ibi bihe bya COVID19.

 

 

 

Leave a Reply

Your email address will not be published. Required fields are marked *