Utubari  dukorera mu bwihisho duteye impungenge  za COVID-19

Yanditswe na UMUHIRE Valentin

 

Mu gihe zimwe muri serivisi zigenda zikomorerwa  zigatangira gukora nyuma y’amezi asaga ane icyorezo cya COVID-19 kigeze mu Rwanda , utubari  ni  tumwe mu bikorwa nanubu bigifunzwe .Nubwo twitwa ko dufunzwe nyamara hirya no hino mu gihugu turakora  mu buryo butazwi .Nko mu karere ka Musanze aho utubari dukorera mu bwihisho bahita  “mubwone “

 Mubwone”  ni ijambo rimaze kumenyerwa cyane cyane mu turere twa Burera na Musanze .Iyo umuntu akubwiye ati “tujye mubwone “ aba ari kugutumira  ngo mujye mu kabari .Ntidukorera mu  nyubako ubusanzwe zari zigenewe utubari kuko zifunze ,ariko abakoreragamo benshi bagiye bahindura umuvuno .Bamwe  bakorera mu ngo zabo, abandi bapimira mu ntoki ndetse n’amashyamba amwe n’amwe yahindutse utubari ku buryo mu masaha y’amanywa usanga ishyamba ririmo  abantu benshi bicaye banywa .

Gusa haba harinzwe bikomeye n’abasore ku buryo ushatse kuhagera batakuzi  wakirizwa amagambo y’ iterabwoba arimo  no kuba bakugirira nabi uramutse ugize icyo utangaza ku mikorere yabo.

Muri utu tubari twiswe “mubwone “ biragoye kubona  abantu bubahiriza amabwiriza yo kwirinda icyorezo cya COVID-19.Kwambara udupfukamunwa  ntibabikozwa , guhanahana intera  ntibabyitayeho , gukaraba intoki byo  ntibyakunda kuko nta kandagirukarabe ziba mu ishyamba .

Ikibaraje ishinga ni ukunywa no gucungana n’inzego z’umutekano  cyangwa abandi bantu bose bashobora kubatangaho amakuru.

Kuba utubari tudakomorerwa ngo natwo dukore twubahiriza amabwiriza yo kwirinda icyorezo cya COVID-19 ni ikibazo usanga kiremereye abakoraga ubwo bucuruzi bwatwo.

Umwe mu bacuruza utubari wo mu karere ka Musanze yabwiye VALUE NEWS ati “twarahungabanye  rwose bikomeye .Birakwiye ko nkuko bashyizeho ingamba zo kwirinda mu nsengero none zikaba zarakomorewe natwe bakwiye  kudukomorera bagashyiraho izo ngamba  kandi twazubahiriza .Hari abantu bafite utubari dufite umwanya mugari kuburyo guhana intera, gukaraba intoki no kwambara agapfukamunwa byakubahirizwa rwose ariko abantu bagakora “

Mu mujyi wa Kigali ndetse no hirya no hino mu gihugu  hamwe mu hacururizwaga utubari ubu bahahinduye za resitora , ariko nyamara iyo ugenzuye neza  bacuruza inzoga kuruta uko bacuruza ibiryo kandi bigakorwa rwihishwa .Ibi bishobora kugira ingaruka zikomeye kuko umwanya bagahaye gutekereza kukwirinda usanga baba bacungana n’ inzego z’umutekano ngo zitabafata .

Nubwo  ba nyir’utubari bavuga ibi ariko ndetse bakagaragaza ko baramutse bakomorewe  bakubahiriza amabwiriza yo kwirinda COVID-19 , siko inzego z’ubuzima zibibona .Umuyobozi w’ikigo cy’igihugu gishinzwe ubuzima (RBC) Dr Nsanzimana Sabin avuga ko gufungura utubari muri iki gihe bitoroshye .

Ati “impamvu utubari tudafungura buri wese yayiyumvisha .uretse nay a ntera  hari n’ ibindi bintu  byinshi byibazwa .Urebye ibintu bihkorerwa (mu tubari ) abantu baba bagiye gusabana , bagiye kwegerana , ukibaza uti ese aba bantu  barahava bagifite ibyemezo byo kwirinda nkuko baje bameze ?”

Izi mpungenge za Dr Nsanzimana  zishingira kukuba mu tubari uko umuntu  yajemo bigoye kuba ariko ari busohokemo bitewe nuko ari ahantu hafatirwa ibinyobwa bisembuye  bishobora no gutuma umuntu asinda agata ubwenge akibagirwa ibyo yari arimo.

Dr Nsanzimana ati “ugasanga umuntu niba yagombaga kunywa icupa rimwe anyweye atatu, ese azakomeza kuba yambaye agapfukamunwa ? , azakomeza gushyiramo intera ?ese utwo tubari abantu batumaramo igihe kingana iki?hatwikiriye gute ?”

Umuyobozi wa RBC avuga ko ahantu hafunganye cyangwa hatwikiriye hashobora kuba indiri ya coronavirus kuko haba hadatuma umuyaga utwara iyo virusi, bityo rero bikaba bigoye ko twafungurwa .

Ku kirebana n utubari  dukorera mu bwihisho ndetse n’ahantu hatemewe , Minisitiri w’ Ubutegetsi bw’ igihugu Prof Shyaka Anastase yabwiye VALUE NEWS ko abantu bakora ibyo  babihanirwa , ariko kandi asaba inzego z’ibanze kubikurikirana .

Ati “ aho utwo tubari  dukorera mu ngo tuba  ni mu midugudu ni mu masibo , abayobozi rero bagombye kuba batuzi  kuko inzego z’ imiyoborere y’ gihugu ntizahagaze gukora .Buri muyobozi wese akwiye kuba afite ayo makuru ya bene utwo tubari kandi tukamaganwa

Leave a Reply

Your email address will not be published. Required fields are marked *