Covid-19: Kutavuga rumwe ku rukingo rwa AstraZeneca  bituma bamwe barutinya

Inkubiri yo guhagarika no guharabika urukingo rwa AstraZeneca  irushaho gutera ubwoba mu bantu, bikanaba intandaro yo kurwanga no kurutwerera ingaruka rutagira. Inzobere mu by’indwara z’ibyorezo, Marie-Paule Kieny, asaba ko ibijyanye n’inkingo za  Covid-19 byakoranwa umucyo.

Uko hamwe bamagana uru rukingo, abandi bakavuga ko rufite abo rugenewe, biha urwaho ibihuha bihungabanya rubanda. Gusa  RBC yo ivuga ko  inkingo zose uko ziboneka, gukingira bigomba guhera ku bakuze.

Hari ibihugu byinshi byagiye byamagana urukingo rwa AstraZeneca, ibindi bikarwemerera abarengeje imyaka 55 gusa, naho ibindi bikavuga ko ruterwa abarengeje imyaka 30.

Mu Budage ho barwemerera abarengeje imyaka 60, ngo ariko n’abakiri bato bumva byihutirwa gukingirwa benerewe kuruhabwa.

Iyi nzobere isanga kwamagana ruriya rukingo mu buryo bwa burundu ari uburyo bwo gutuma rwangwa henshi, nyamara ahari abo rugirira akamaro.

Agira ati, “amakuru y’isi ubu asigaye yihuta, ariko nanone biragoye ko mu gihugu kimwe urukingo rwafatwa kimwe nko mu kindi. Byose biterwa n’inzira runyuzwamo n’uburyo rubikwa, ariko nta mpamvu yo kubihisha. Abantu bagomba kubiganira akandi bagashyiramo ubwenge buhagije”.

Ikindi agarukaho ni uko abantu batahabwa umwanya wo kwihitiramo urukingo bahabwa, ngo kuko no ku zindi nkingo z’ibicurane  nta wemerewe kwihitiramo. Hanyuma ati, “Ntabwo abantu bazategereza inking zitaraza kandi hari izihari, nubwo hari iziterwa rimwe risa. Izo rero zagahawe abantu batuye kure y’amavururiro, abantu bagomba kuba magirirane, kuko uko hakingirwa benshi niko icyorezo kibura inzira zigikwirakwiza”.

Abana n’ingimbi nabo bagomba gukingirwa!?

Marie-Paule Kieny avuga ko nubwo icyorezo kibasira abakuze, abana n’ingimbi nibo bagendagenda cyane, abajya kwiga n’abajya mukazi; ari nako abarwaye Covid-19 badakingiye bayikwirakwiza; kabone nubwo bo nta bimenyetso byayo baba bagaragaza.

Akagira ati, “Erega, abantu bumve ko urukingo atari igisubizo ku muntu ku giti cye, ahubwo ni ku bw’inyungu rusange: uwikingije aba yirinze we ubwe, anarinze abandi kwandura”.

Ibi bishimangirwa na Prof Liam Smeeth wo muri London School of Hygiene and Tropical Medicine, uvuga ku mpamvu yo gukingira. Ati, “urukingo rukwiye gufatwa nk’umuhate wa sosiyete wo kurinda abandi”.

Umuyobozi wa RBC, Dr Nsanzimana Sabin avuga ko inkingo zemejwe kugeza ubu ari izigenewe abantu barengeje imyaka 16. Ati, “Ubu ni uguhera ku myaka 16 kuzamura, abato bari munsi y’iyo myaka bazategereza ubushakashatsi burangire”.

Anavuga ko gukingira bizakomeza uko inkingo ziboneka, ariko bigahera mu bakuze mu myaka, kumanura. Asoza agira ati, “Urukingo ni ubuzima”.

Karegeya Jean Baptiste

Leave a Reply

Your email address will not be published. Required fields are marked *